वाघोलीत माझ्या घरी का राहतेस, म्हणून जावयाकडून सासूला मारहाण तर मेव्हुणीवर चाकू हल्ला..

वाघोली (ता. हवेली) येथे सासूला घरातून निघून जाण्याची धमकी देत जावयाने मारहाण केली आणि भांडण सोडवण्यासाठी आलेल्या मेव्हणीवर चाकूने हल्ला केल्याचा प्रकार समोर आला आहे.या प्रकरणी पुष्पा वामन शेलार (वय ६५, रा. वाघोली, केसनंद रोड) यांनी लोणीकंद पोलीस ठाण्यात फिर्याद दिली आहे. त्यांच्या फिर्यादीनुसार जावई रोशन डेव्हिड मंडलिक (वय ३९, रा. वाघोली, केसनंद रोड) याच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी या त्यांची लहान मुलगी वैशाली हिच्या घरी रहात होत्या. जावई रोशन याला ते आवडत नव्हते. तो घरी आल्यानंतर त्याने सासुला, तू माझ्या घरी कधीपर्यंत राहणार आहे. तू माझ्या घरातून निघून जा, असे म्हणून सासुला शिवीगाळ करुन हाताने मारहाण केली. तेव्हा फिर्यादी यांची मोठी मुलगी दिपाली ही त्यांचे भांडण सोडविण्यासाठी मध्ये पडली.

तेव्हा रोशन याने तिला शिवीगाळ करुन तू मध्ये का आलीस, असे म्हणून घरात जमिनीवर पडलेल्या भाजी कापण्याच्या चाकूने मुलीच्या डाव्या हाताच्या दंडावर मारुन तिला जखमी केले. फिर्यादी या त्याच्या हातातून चाकू काढून घेत असताना फिर्यादीच्या उजव्या हाताच्या बोटाला जखम झाली. यानंतर सासुने लोणीकंद पोलीसात फिर्याद दिली.

५ नोव्हेंबर २०२४ रोजी रात्री साडेअकरा वाजता पुष्पा शेलार या मुलगी वैशाली हिच्या घरी राहत होत्या. यावेळी जावई रोशन घरी आला आणि सासूला घरातून निघून जाण्याची धमकी देत शिवीगाळ केली. त्यानंतर त्याने सासूला हाताने मारहाण केली. भांडण सोडवण्यासाठी आलेल्या फिर्यादींच्या मोठ्या मुलीवर, दिपाली हिच्यावर, रोशन याने भाजी कापण्याचा चाकूने वार केला.

या हल्ल्यात दिपालीच्या डाव्या हाताला गंभीर दुखापत झाली, तर सासूला चाकू काढून घेताना उजव्या हाताच्या बोटाला दुखापत झाली.लोणीकंद पोलीस ठाण्यात गुन्हा दाखल असून पोलीस हवालदार बांगर पुढील तपास करीत आहेत.