पाण्यात उमटले हजारो दिव्यांचे मनमोहक प्रतिबिंब; जिल्हा परिषद सदस्य किरण साकोरे यांच्या माध्यमातून दीपप्रज्वलन, कमानी घाट संवर्धन समितीचा पुढाकार अन् ग्रामस्थांचा उत्स्फूर्त सहभाग!
फुलगाव (ता. हवेली) हजारो पणत्यांचा लखलखता प्रकाश… ऐतिहासिक कमानीचे उजळलेले रूप… पाण्यावर उमटणारी दीपमाळेची मनोहारी प्रतिबिंबे आणि या अद्भुत सोहळ्याचे साक्षीदार झालेले शेकडो ग्रामस्थ… अशा नेत्रदीपक वातावरणात फुलगाव येथील ऐतिहासिक पेशवे घाटावर दिवाळीनिमित्त आयोजित दीपोत्सवाने अवघ्या परिसराचे लक्ष वेधून घेतले. एक हजार एकशे आकरा दिव्यांच्या प्रकाशाने पेशवे घाट उजळून निघाला आणि ऐतिहासिक वास्तूच्या सौंदर्यात दीपोत्सवाने अनोखी भर घातली.
दिवाळीच्या मंगलमय पर्वाचे औचित्य साधत कमानी घाट संवर्धन समितीच्या वतीने या भव्य दीपोत्सवाचे आयोजन करण्यात आले होते. या उपक्रमासाठी जिल्हा परिषद सदस्य किरण साकोरे यांच्या माध्यमातून पेशवे घाटावर दिवे लावण्यात आले. समितीच्या पदाधिकाऱ्यांनी, सदस्यांनी आणि ग्रामस्थांनी एकत्रितपणे या सोहळ्याच्या नियोजनात योगदान दिले.
घाटाच्या ऐतिहासिक कमानीपासून तटबंदीपर्यंत, पायऱ्यांपासून परिसरातील विविध ठिकाणांपर्यंत पणत्यांची आकर्षक मांडणी करण्यात आली होती. हजारो दिव्यांच्या प्रकाशात ऐतिहासिक कमानीचे देखणे रूप अधिकच खुलून दिसत होते. घाटासमोरील पाण्यात पडलेली दिव्यांची प्रतिबिंबे जणू प्रकाशाची दुसरी दीपमाळच साकारत होती. हा नयनरम्य देखावा पाहण्यासाठी ग्रामस्थांनी मोठी गर्दी केली होती. अनेकांनी या अविस्मरणीय क्षणांचे छायाचित्रण करून आनंदाच्या आठवणी जपल्या.
केवळ दीपोत्सव नाही, ऐतिहासिक वारशाच्या जतनाचा संकल्प! – फुलगावचा ऐतिहासिक पेशवे घाट हा गावाच्या सांस्कृतिक आणि ऐतिहासिक वैभवाची ओळख आहे. या वास्तूला प्रकाशाच्या माध्यमातून नवा साज चढविण्याबरोबरच तिचे महत्त्व नव्या पिढीपर्यंत पोहोचविण्याचा संदेश या उपक्रमातून देण्यात आला. गावातील ऐतिहासिक वास्तूंचे संवर्धन, सांस्कृतिक परंपरांचे जतन आणि सामाजिक एकोपा वृद्धिंगत करण्यासाठी अशा उपक्रमांची आवश्यकता अधोरेखित झाली.
जिल्हा परिषद सदस्य किरण साकोरे यांचे योगदान, कमानी घाट संवर्धन समितीचे नियोजन आणि ग्रामस्थांचा उत्स्फूर्त सहभाग यांचा सुंदर संगम या दीपोत्सवात पाहायला मिळाला. हजारो पणत्यांच्या प्रकाशात उजळलेला पेशवे घाट आणि पाण्यात उमटलेले त्याचे प्रतिबिंब यामुळे फुलगावच्या दिवाळीला यंदा ऐतिहासिक वैभवाची अनोखी झळाळी लाभली.
फुलगाव येथील ऐतिहासिक कमानी घाटावर हजारो दिव्यांच्या मंगलमय प्रकाशात दीपोत्सव साजरा करताना अत्यंत आनंद होत असून येथे छत्रपती शिवाजी महाराज यांच्या पुतळ्याभोवती फुलांची आकर्षक सजावट व रांगोळी काढण्यात येऊन ऐतिहासिक कमानी घाटावर एक अनोखा दीपोत्सव साजरा करण्यात आला भविष्यात याला भव्य दिव्य स्वरूप देण्यात येणार आहे. फटाकड्यांच्या आतषबाजी करत घाट प्रकाशाने उजळला होता. ग्रामस्थांच्या सहकार्याने भविष्यात आणखी मोठा दीपोत्सव साजरा करण्यात येईल.- किरण साकोरे, पुणे जिल्हा परिषद सदस्य, पेरणे लोणीकंद जिल्हा परिषद गट
