शिरूर, ता. ६ : शिरूर तालुक्यातील निमगाव म्हाळुंगे येथील रणदिवेवस्तीमध्ये अज्ञात चोरट्यांनी घरफोडी करून ९ लाख ५२ हजार ७३४ रुपयांचा ऐवज लंपास केल्याची घटना उघडकीस आली आहे. सोन्याचे दागिने व रोख रक्कम चोरीला गेल्याने परिसरात खळबळ उडाली असून शिक्रापूर पोलिसांनी अज्ञात चोरट्यांविरुद्ध गुन्हा दाखल केला आहे.
याप्रकरणी अमोल सोपान काळकुटे (वय ४०) यांनी फिर्याद दिली आहे. फिर्यादीनुसार, ५ ऑगस्ट रोजी अज्ञात चोरट्यांनी त्यांच्या घराचा दरवाजा उचकटून आत प्रवेश केला. त्यानंतर घरातील कपाटातील सोन्याचे दागिने, विविध मौल्यवान वस्तू आणि रोख रक्कम असा एकूण ९ लाख ५२ हजार ७३४ रुपयांचा ऐवज चोरून नेला. चोरीचा प्रकार उघडकीस आल्यानंतर त्यांनी तातडीने शिक्रापूर पोलिस ठाण्यात धाव घेत तक्रार नोंदविली.
घटनेची माहिती मिळताच पोलिसांनी घटनास्थळी पाहणी करून पुरावे संकलित केले. परिसरातील सीसीटीव्ही फुटेजची तपासणी सुरू असून अज्ञात चोरट्यांचा शोध घेण्यासाठी विशेष पथके कामाला लागली आहेत. या प्रकरणाचा पुढील तपास पोलीस उपनिरीक्षक देशमुख करीत आहेत.
याप्रकरणी प्रतिक बबन खैरे (वय २३, रा. देवाची वाडी, जि. बीड) यांनी फिर्याद दिली आहे. पोलिसांनी देवा खेडकर, अनिकेत (पूर्ण नाव व पत्ता अज्ञात) तसेच त्यांचे अन्य चार साथीदार यांच्याविरोधात गुन्हा नोंदविला आहे. फिर्यादीनुसार, ४ ऑगस्ट रोजी पहाटे चारच्या सुमारास महागणपती पोलीस अकादमीसमोर ट्रेलर अडवून आरोपींनी शिवीगाळ करत फिर्यादी व चालक दत्ता पवार यांना खाली उतरवले. त्यानंतर लाकडी दांडके, लोखंडी रॉड व वायरने दोघांना बेदम मारहाण करण्यात आली. तसेच “जिवंत सोडणार नाही,” अशी धमकी देत ट्रेलरचेही नुकसान करण्यात आल्याचे फिर्यादीत नमूद आहे. या हल्ल्यात दोघेही जखमी झाले असून त्यांच्यावर उपचार करण्यात आले.
या घटनेची माहिती मिळताच रांजणगाव एमआयडीसी पोलिसांनी घटनास्थळी धाव घेत पंचनामा करून गुन्हा दाखल केला. प्रकरणाचा पुढील तपास पोलीस हवालदार गायकवाड करीत आहेत.
विघ्नहर्ता स्टोन क्रशर परिसरात तरुणाला बेदम मारहाण; तिघांविरोधात गुन्हा
शिरूर, ता. ६ : शिरूर तालुक्यातील बाभुळसर येथील विघ्नहर्ता स्टोन क्रशर परिसरात एका तरुणाला तिघांनी अडवून शिवीगाळ करत बेदम मारहाण केल्याची घटना घडली. या मारहाणीत तरुण जखमी झाला असून याप्रकरणी शिरूर पोलिस ठाण्यात तीन अज्ञात आरोपींविरोधात गुन्हा दाखल करण्यात आला आहे. घटनेमुळे परिसरात काही काळ तणावाचे वातावरण निर्माण झाले होते.
याप्रकरणी प्रतीक धर्मपाल शंभरकर (वय २६) यांनी फिर्याद दिली आहे. फिर्यादीनुसार, ४ ऑगस्ट रोजी सायंकाळी सातच्या सुमारास बाभुळसर गावाच्या हद्दीतील विघ्नहर्ता स्टोन क्रशर परिसरात फिर्यादी असताना तीन अज्ञात आरोपींनी त्यांना अडवले. जुन्या कारणावरून वाद घालत शिवीगाळ केली आणि त्यानंतर हाताने तसेच लाकडी दांडक्याने बेदम मारहाण केली. यावेळी जीवे मारण्याची धमकीही देण्यात आल्याचे फिर्यादीत नमूद करण्यात आले आहे. मारहाणीनंतर आरोपी घटनास्थळावरून पसार झाले. जखमी झालेल्या फिर्यादीने पोलिस ठाण्यात धाव घेत तक्रार दिल्यानंतर गुन्हा दाखल करण्यात आला.
घटनेची माहिती मिळताच पोलिसांनी घटनास्थळी भेट देऊन पंचनामा केला. अज्ञात आरोपींचा शोध सुरू असून या प्रकरणाचा पुढील तपास पोलीस हवालदार भासे करीत आहेत.
शिक्रापूरमध्ये दिवसाढवळ्या घरफोडी; सोन्याचे दागिने व रोख रक्कम असा ८७ हजारांचा ऐवज लंपास
शिक्रापूर, ता. ६ : शिरूर तालुक्यातील गारकोळवाडी येथे बंद घराचा दरवाजा फोडून अज्ञात चोरट्यांनी सोन्याचे दागिने व रोख रक्कम असा सुमारे ८७ हजार रुपयांचा ऐवज चोरून नेल्याची घटना उघडकीस आली आहे. या प्रकरणी शिक्रापूर पोलिस ठाण्यात अज्ञात चोरट्याविरोधात घरफोडीचा गुन्हा दाखल करण्यात आला असून पोलिसांकडून तपास सुरू आहे.
याप्रकरणी चांगुणाबाई कचरू रूपनर (वय ६०) यांनी फिर्याद दिली आहे. फिर्यादीनुसार, ४ ऑगस्ट रोजी सकाळी घर बंद करून बाहेर गेल्यानंतर अज्ञात चोरट्यांनी घराचे कुलूप तोडून आत प्रवेश केला. घरातील कपाटाची झडती घेत सोन्याचे दागिने व रोख रक्कम असा एकूण ८७ हजार रुपयांचा ऐवज चोरून नेला. घरी परतल्यानंतर चोरीचा प्रकार निदर्शनास येताच त्यांनी शिक्रापूर पोलिस ठाण्यात तक्रार दाखल केली. घटनेची माहिती मिळताच पोलिसांनी घटनास्थळी पाहणी करून पंचनामा केला. परिसरातील सीसीटीव्ही फुटेजची तपासणी करण्यात येत असून अज्ञात चोरट्यांचा शोध सुरू आहे. या प्रकरणाचा पुढील तपास पोलीस हवालदार साने करीत आहेत.
शिरूर शहरातील घरफोडीत ३.६९ लाखांचा ऐवज लंपास
शिरूर, ता. ६ : शिरूर शहरातील सुंदर सृष्टी, गोलेगाव रस्ता परिसरात बंद घर फोडून अज्ञात चोरट्यांनी तब्बल ३ लाख ६९ हजार २५० रुपयांचा ऐवज लंपास केल्याची घटना उघडकीस आली आहे. या घटनेमुळे परिसरात भीतीचे वातावरण निर्माण झाले असून शिरूर पोलिसांनी अज्ञात चोरट्यांविरुद्ध गुन्हा दाखल करून तपास सुरू केला आहे.
याप्रकरणी ज्ञानेश्वर अंगद लांबूड (वय ३९) यांनी फिर्याद दिली आहे. फिर्यादीनुसार, २ ऑगस्ट ते ४ ऑगस्टदरम्यान अज्ञात चोरट्यांनी त्यांच्या घराच्या खिडकीचे ग्रील तोडून आत प्रवेश केला. त्यानंतर घरातील कपाट उघडून सोन्याचे दागिने, चांदीचे साहित्य तसेच रोख रक्कम असा एकूण ३ लाख ६९ हजार २५० रुपयांचा ऐवज चोरून नेला. घरी परतल्यानंतर घरातील सामान अस्ताव्यस्त पडलेले दिसून आले. तपासणी केली असता मौल्यवान वस्तू चोरीला गेल्याचे लक्षात आले. त्यानंतर त्यांनी तातडीने शिरूर पोलिस ठाण्यात तक्रार दाखल केली.
घटनेची माहिती मिळताच पोलिसांनी घटनास्थळी पाहणी करून पंचनामा केला. परिसरातील सीसीटीव्ही फुटेज आणि इतर तांत्रिक पुराव्यांच्या आधारे अज्ञात चोरट्यांचा शोध सुरू करण्यात आला आहे. या प्रकरणाचा पुढील तपास पोलीस उपनिरीक्षक चव्हाण करीत आहेत.
