उत्सुकतेचा कळस… प्रश्न अनेक.. उत्तर फक्त एकच… सस्पेन्स आणि सस्पेन्स
कोरेगाव भिमा – लोणीकंद (ता. हवेली) शिरूर हवेली विधानसभा मतदार संघात भाजप कार्यकर्त्यांमध्ये मोठ्या प्रमाणात सस्पेन्स वाढला आहे. आगामी निवडणुकीत कोणती भूमिका घेतली जाणार याबाबत अनेक प्रश्ने उपस्थित होत असून भाजपच्या कार्यकर्ता मेळाव्यात उमेदवारीबाबत निर्णय होण्याची अपेक्षा व्यक्त केली जात आहे.
शिरूर हवेलीमधील भाजपचे निवडणूक प्रमुख प्रदीप कंद यांनी कार्यकर्ता मेळाव्याच्या माध्यमातून या निवडणुकीबाबत भूमिका स्पष्ट करणार असल्याचे सांगितले. यावेळी यशवंत’ सहकारी साखर कारखान्याचे अध्यक्ष सुभाष जगताप, क्रीडा आघाडीचे पै. संदीप भोंडवे, हवेली तालुकाध्यक्ष शाम गावडे, शिरूर तालुकाध्यक्ष आबा सोनवणे, कामगार आघाडीचे जयेश शिंदे या प्रमुख पदाधिकाऱ्यांनी सुद्धा आपली नाराजी व्यक्त केली.
राष्ट्रवादीचे नेते अजित पवार हे शिरूर- हवेली विधानसभा मतदारसंघातून निवडणूक लढणार म्हणून भाजप कार्यकर्त्यांनी त्यांचा आदर ठेवीत महायुतीतून त्यांना मदत करण्याची भूमिका ठेवली होती.परंतू ते निवडणूक लढविणार नसतील तर संघटनात्मक पातळीवरील ताकद व अनुकूल परिस्थितीने भाजपला ही जागा सोडावी, असे मत शिरुरचे भाजप विधानसभा निवडणूक प्रमुख प्रदिप कंद यांनी व्यक्त केले आहे. ते शुक्रवार (दि.२४) सायंकाळी पत्रकार परिषदेत व्यक्त केले.
मेळाव्यात घेणार निर्णय –भाजपला ही जागा सोडली नाही, तर स्वाभाविकपणे भाजपचे कार्यकर्ते व पदाधिकारी यांचा माझ्यावर मैत्रिपूर्ण अथवा स्वतंत्ररीत्या निवडणूक लढविण्याचा दबाव असून या संदर्भातील वरिष्ठांना मी माझ्या भावना कळविल्या आहे. तसेच येत्या रविवारी समर्थकांची बैठकीत निर्णय घेऊन निवडणूक लढविणार की नाही ? याचा निर्णय घेणार असल्याची स्पष्टोक्ती प्रदिप कंद यांनी दिली.
पारंपरिक मतदार संघावर अधिकार का? – शिरूर हवेली भाजपचा पारंपरिक मतदार संघ मानला जातो. अजित पवार यांच्या नेतृत्वाखालील राष्ट्रवादी काँग्रेसला ही जागा मिळाल्यामुळे भाजप कार्यकर्त्यांमध्ये नाराजीची लाट उसळली आहे. प्रदेशाध्यक्ष चंद्रशेखर बावनकुळे यांनी “पुढील आमदार भाजपचाच पाहायला मिळेल” असा आत्मविश्वास व्यक्त करत, गेल्या पाच वर्षांत या मतदार संघात भाजपने केलेल्या प्रयत्नांचा पुनरुच्चार केला.
भाजप नेत्यांच्या मते, या मतदार संघाची मागणी केवळ पक्ष संघटना मजबूत करण्यासाठी नसून कार्यकर्त्यांना न्याय मिळवून देण्यासाठी आहे. केंद्र आणि राज्य सरकारच्या योजनांचे लाभ सर्वसामान्य नागरिकांपर्यंत पोहोचवण्यासाठी मतदार संघ आवश्यक असल्याचे भाजपचे पदाधिकारी सांगतात.
कार्यकर्त्यांच्या भावना – थेट लढतीची अपेक्षा – भाजपच्या कार्यकर्त्यांमध्ये तीव्र भावना असून, ही निवडणूक थेट लढत म्हणून पाहिली जावी अशी मागणी केली जात आहे. क्रीडा आघाडीचे संदीप भोंडवे यांनी भाजप कार्यकर्त्यांचा आत्मविश्वास दृढ असल्याचे सांगितले आहे.
शिरूर हवेली विधानसभेत या सस्पेन्सने राजकीय रंग आणला असून पुढील काही दिवसांत भाजपकडून मोठा निर्णय होण्याची शक्यता आहे.
शिरूर हवेलीतील भाजपा कार्यकर्ते ,नेते यांच्यासह सर्वसामान्य नागरिकांच्या भावना तीव्र असल्याने विधानसभा निवडणुक लढण्यावर ८० टक्के संघटन ठाम असून कार्यकर्त्यांच्या भावना तीव्र आहेत. ही थेट लढत व्हावी अशी भावना व्यक्त होत आहे. – संदीप भोंडवे, भाजपा क्रीडा आघाडी
