शिक्रापूर, (ता.शिरूर), दिनांक: २८ नोव्हेंबर: पुणे जिल्हा परिषद व पंचायत समिती शिरूर यांच्या ‘मुख्यमंत्री समृद्ध पंचायतराज अभियान’ अंतर्गत आरोग्य उपकेंद्र शिक्रापूर आणि ग्रामपंचायत शिक्रापूर यांच्या संयुक्त विद्यमाने शिक्रापूर येथे महिलांसाठी भव्य ‘ॲनिमिया मुक्त गाव अभियान’ आरोग्य शिबिराचे यशस्वी आयोजन करण्यात आले. या शिबिरामध्ये महिलांनी उत्स्फूर्त प्रतिसाद देत आरोग्य तपासणीचा लाभ घेतला.
या विशेष अभियानामध्ये प्रामुख्याने महिलांच्या हिमोग्लोबिन (ॲनिमिया), ब्लडप्रेशर (रक्तदाब) आणि शुगर (मधुमेह) या महत्त्वपूर्ण तपासण्या करण्यात आल्या. शिक्रापूर आणि परिसरातील साधारण १५० पेक्षा जास्त महिलांनी या आरोग्य शिबिराचा लाभ घेतला. विशेष म्हणजे, महिलांच्या बरोबरीने पुरुषांनीसुद्धा मोठ्या संख्येने शिबिरात सहभाग नोंदविला.
या आरोग्य शिबिराचे उद्घाटन विद्यमान सरपंच रमेश गडदे यांच्या हस्ते करण्यात आले. शिबिरासाठी ग्रामपंचायतसमोर मंडप आणि आवश्यक व्यवस्था करण्यात आली होती.
याप्रसंगी व्यासपीठावर उपसरपंच वंदना भुजबळ, सदस्य सारिका सासवडे, सदस्य सुभाष मामा खैरे, प्रकाश वाबळे, ग्रामपंचायत अधिकारी नंदकुमार वैद्य, नाट्य परिषदेचे सदस्य पत्रकार राजाराम गायकवाड, संजीव मांढरे सर, पंढाभाऊ गायकवाड, रामराव मंडलिक इत्यादी मान्यवर उपस्थित होते.
यशस्वीतेसाठी आरोग्य कर्मचाऱ्यांचे परिश्रम : हे शिबिर यशस्वी करण्यासाठी आरोग्य उपकेंद्राच्या अधिकारी व कर्मचाऱ्यांनी विशेष परिश्रम घेतले. यामध्ये आरोग्य उपकेंद्राचे समुदाय अधिकारी CHO डॉ. प्रतीक्षा आठवले, ANM नयना जाधव, MPW पवन भवर, तसेच आशा सेविका सुवर्णा तांबे, कविता राऊत, कल्पना ढोकले, कल्याणी वाबळे, अर्चना गायकवाड इत्यादी आरोग्य स्टाफ उपस्थित होता.कार्यक्रमाच्या शेवटी सरपंच रमेश गडदे यांनी अभियानामध्ये सहभागी झालेल्या सर्व महिला, पुरुष आणि आरोग्य कर्मचाऱ्यांचे विशेष आभार मानले.
