प्रतिनिधी राजाराम गायकवाड
शिक्रापूर (ता. शिरूर) – शिक्रापूर-मलठण फाटा परिसरातील चासकमान वसाहत व शुभम हॉटेलसमोर एस.टी. बसथांबा सुरू करण्यात यावा, अशी जोरदार मागणी प्रवासी वर्गाकडून करण्यात येत आहे. यापूर्वी चासकमान कॉलनीसमोर बस थांबा होता; मात्र प्रशासनाने कोणतीही पूर्वसूचना न देता तो अचानक बंद करण्यात आला. त्यामुळे पुणे व शिरूरकडे जाणाऱ्या प्रवाशांची मोठ्या प्रमाणात गैरसोय होत आहे.
नागरिकांच्या या तक्रारीची दखल घेत शिक्रापूर ग्रामपंचायतीचे आदर्शसरपंच रमेश गडदे यांनी बसथांबा पूर्ववत सुरू करण्याची मागणी केली आहे. याबाबतचा औपचारिक पत्रव्यवहार लवकरच एस.टी. विभागाशी करण्यात येणार असल्याचे त्यांनी स्वराज्य टाईम्स शी बोलताना सांगितले.
आदर्श सरपंच रमेश गडदे म्हणाले की, “बस थांबा सुरू झाल्यानंतर प्रवाशांना प्रतीक्षेसाठी योग्य सुविधा मिळाव्यात म्हणून ग्रामपंचायतीतर्फे निवाऱ्याचीही सोय करण्यात येईल. पुणे-शिरूर मार्गावरील नागरिकांची गैरसोय दूर करणे ही आमची प्राथमिकता आहे.”
या ठिकाणी एस.टी. बस थांबा सुरू झाल्यास दैनंदिन प्रवास करणाऱ्यांचा त्रास मोठ्या प्रमाणात कमी होईल. तसेच बसेस या ठिकाणी नियमित थांबविण्यात याव्यात, अशीही मागणी प्रवाशांची आहे.
