पुणे जिल्ह्यात लोणीकंद पेरणे जिल्हा परिषद गटाचा विकास किरण साकोरे करतील असा विश्वास प्रदिप विद्याधर कंद यांनी व्यक्त केला.
पेरणे फाटा (ता. हवेली) – “पुणे जिल्हा परिषद निवडणुकीत महाराष्ट्रातील सर्वाधिक मतांनी निवडून येण्याचा माझा रेकॉर्ड पै. किरण साकोरे निश्चित मोडतील. पुणे जिल्ह्यात ‘एक नंबर’ मतांनी विजयी होणारा उमेदवार म्हणजे किरण साकोरे,” असा विश्वास जिल्हा परिषदेचे माजी अध्यक्ष प्रदीप विद्याधर कंद यांनी व्यक्त करताच उपस्थितांनी टाळ्यांच्या कडकडाटात उत्स्फूर्त प्रतिसाद दिला. पुणे जिल्ह्यातील एक नंबरचा सर्वांगीण विकास लोणीकंद पेरणे जिल्हा परिषद गटाचा केल्याशिवाय किरण राहणार नाही, सेवेची जबाबदारी किरणची आणि सर्वांगीण विकासाची जबाबदारी माझी असे प्रतिपादन पुणे जिल्हा परिषदेचे माजी अध्यक्ष प्रदीप विद्याधर कंद यांनी सिद्धेश्वर मंगल कार्यालयात आयोजित दर्शन यात्रेच्या प्रस्थान सोहळ्यावेळी केले.
सेवा किरणची… विकासाची हमी माझी – यावेळी प्रदीप विद्याधर कंद यांनी लोणीकंद पेरणे जिल्हा परिषद गटाच्या विकासाची स्पष्ट ग्वाही दिली. ते म्हणाले, “तीर्थयात्रांमुळे माणसं जोडली जातात आणि जोडलेल्या माणसांसाठी विकासाचं काम केलं जातं. भाविकांची सेवा करण्याची जबाबदारी किरण साकोरे यांची असेल, तर लोणीकंद-पेरणे गटाचा पुणे जिल्ह्यात ‘एक नंबर’ विकास करण्याची जबाबदारी माझी आहे.” किरण साकोरे सर्व समाज घटकांना सोबत घेऊन काम करत आहेत त्याची प्रचिती काशी अयोध्या देवदर्शन यात्रेच्या तिन्ही रेल्वे यात्रांना, नागपूर दिक्षा भूमी अभिवादन सोहळ्यास आंबेडकर अनुयायी बांधवांचा मिळालेला उत्स्फूर्त प्रतिसाद तर आता बाळू मामांचे अदमापूर, कोल्हापूर, तुळजापूर व स्वामी समर्थांच्या अक्कलकोट दर्शनासाठी हजारो भाविकांनी दिलेला उत्स्फूर्त प्रतिसाद त्यांच्या लोकसेवेची प्रचिती देत आहे.
अडीच हजार भाविकांचा प्रतिसाद; सेवेमुळे जनता प्रभावित – किरण साकोरे यांच्या सेवाभावाला गटातील जनतेकडून मोठा प्रतिसाद मिळत आहे. प्रदीप दादा कंद युवा मंच आणि पै. किरण साकोरे मित्रपरिवाराच्या वतीने आयोजित केलेल्या विविध देवदर्शन यात्रांमध्ये गटातील हजारो भाविक सहभागी होत आहेत. “किरण साकोरे सढळ हाताने लोकांची सेवा करतात. यात्रेकरूंची व्यवस्था, त्यांच्या कुटुंबाची काळजी ते कुटुंबियांप्रमाणे घेतात. त्यांच्या सेवा, समर्पण आणि विकासाच्या दृष्टिकोनामुळेच जनता भरभरून प्रतिसाद देत आहे. देवदर्शन घेताना पहिला आशीर्वाद आपल्या कुटुंबासाठी, आणि दुसरा आशीर्वाद किरण साकोरे यांच्या स्वप्नपूर्तीसाठी मागाल, हा माझा विश्वास आहे.
भाऊ मी तुला सांगतो : आम्ही विकासाची कामे करून दाखवली . सर्वसामान्य माणसांच्या हितासाठी काम करत आहे. आपल्या सर्वांची सेवा करत असल्याचा आनंद व समाधान दुसरे कशात नाही.
एआय तंत्रज्ञानाचा वापर करून संभ्रम निर्माण करणाऱ्यांपासून सावध राहा: सध्या तंत्रज्ञानाचे युग आहे. एआय तंत्रज्ञानाच्या गैरवापरावर प्रदिप विद्याधर कंदांकडून इशारा देत सर्वांचे लक्ष वेधले. “माझे आणि काहींचे नाव सारखे असल्यामुळे एआय (AI) तंत्रज्ञानाचा गैरवापर करून फोटो किंवा व्हिडिओ तयार करण्याचा प्रयत्न होऊ शकतो. पण आम्ही खरे आहोत आणि किरण साकोरे यांच्या पाठीशी मी ठाम उभा आहे, त्यामुळे कोणत्याही अफवांवर विश्वास ठेवू नये” असे स्पष्टीकरण त्यांनी दिले. ‘लाल मातीशी घट्ट नाळ’ जोडलेला आणि माणुसकी जपणारा किरण साकोरे हा कार्यकर्ता असल्यानेच, माझ्या निवडून येण्याचा रेकॉर्डपेक्षा जास्त मतांनी तो विजयी होणार, हा माझा शब्द आहे, असे कंद यांनी नमूद केले.
यावेळी हवेली पंचायत समितीचे माजी उपसभापती माऊली वाळके, पुणे हवेली कृषी उत्पन्न बाजार समितीचे माजी उपसभापती रविंद्र कंद,पंचायत समितीच्या माजी उपसभापती संजिवनी कापरे, लोकनियुक्त प्रथम सरपंच मंदाकिनी साकोरे, माजी सरपंच राहुल शिंदे, भाजपचे भाऊसाहेब झुरुंगे, गौरव झुरुंगे, विजय वाळुंज, माजी ग्राम पंचायत सदस्य रुपेश गावडे, भाजपचे गणेश गायकवाड, संदिप गायकवाड, दत्ता वाळके, व इतर भाविक भक्त मोठ्या संख्येने उपस्थित होते.
कार्यक्रमाचे प्रास्ताविक अतुल बनकर यांनी तर आभार माजी सरपंच सुनील वागस्कर यांनी मानले.
