अंबाजोगाई – सेवेतून निलंबित असलेले माजी पोलिस निरीक्षक सुनील नागरगोजे यांनी अंबाजोगाई येथील आपल्या राहत्या घरी गळफास घेऊन आत्महत्या केल्याची धक्कादायक घटना काल (सोमवारी) रात्री ८ वाजता उघडकीस आली आहे.
परळी तालुक्यातील नागदरा हे मूळ गाव असलेले सुनील नागरगोजे हे अनेक वर्षांपासून अंबाजोगाई येथे वास्तव्यास होते. परभणी, लातूर आणि बीड या जिल्ह्यांत त्यांनी पोलिस सेवेत काम केले होते. परभणी येथील एका प्रकरणावरून त्यांच्यावर चौकशी सुरू होती, आणि त्यानंतर एप्रिल २०२५ मध्ये त्यांना सेवेतून बडतर्फ करण्यात आले होते. तेव्हापासून ते नैराश्यात होते, असे बोलले जात आहे.
घराचे बांधकाम सुरू असल्यामुळे ते सध्या अंबाजोगाई येथील एका भाड्याच्या घरात एकटेच राहत होते. त्यांची पत्नी मुलांसोबत पुण्याला गेली होती. रात्री ८ च्या सुमारास त्यांनी आत्महत्या केल्याचे समोर आले.
आत्महत्येचे नेमके कारण अद्याप स्पष्ट झालेले नाही. अंबाजोगाई शहर पोलिसांनी घटनास्थळी धाव घेऊन मृतदेह ताब्यात घेतला असून, पुढील तपास सुरू आहे. त्यांच्या पश्चात आई, पत्नी, एक मुलगा आणि एक मुलगी असा परिवार आहे.
