वाघोली (ता.शिरूर) सावित्रीबाई फुले पुणे विद्यापीठ अंतर्गत आयोजित आंतरविभागीय बॉक्सिंग (मुले व मुली) स्पर्धा भारतीय जैन संघटनेच्या कला, विज्ञान व वाणिज्य महाविद्यालयात (बी.जे.एस.) दि. १० व ११ ऑक्टोबर २०२५दरम्यान अभूतपूर्व उत्साहात संपन्न झाल्या. पुणे शहर, जिल्हा, आहिल्यानगर आणि नाशिक विभागांतील एकूण १४० (८० मुले व ६० मुली) खेळाडूंनी या स्पर्धेत सहभाग घेऊन आपली जिद्द आणि कौशल्ये पणाला लावली.
पुरस्कार विजेत्यांच्या उपस्थितीत स्पर्धेचे शानदार उद्घाटन – या भव्य स्पर्धेचे उद्घाटन सोहळा क्रीडा क्षेत्रातील मान्यवरांच्या उपस्थितीत पार पडला. अर्जुन पुरस्कार विजेते मनोज पिंगळे आणि शिवछत्रपती पुरस्कार विजेते पद्माकर फड यांच्यासह बी.जे.एस. प्रबंध समितीचे अध्यक्ष विलास राठोड, प्रकल्प व्यवस्थापक सुरेश साळुंके, प्राचार्य डॉ. संजय गायकवाड, व विद्यापीठ प्रतिनिधी किशोर घडिया आणि दत्ता उत्तेकर हे प्रमुख पाहुणे म्हणून उपस्थित होते.यावेळी बोलताना मान्यवरांनी खेळाडूंना प्रोत्साहन देत ‘खेळातील शिस्त आणि समर्पण’ याचे महत्त्व अधोरेखित केले.
बी.जे.एस.ची क्रीडा परंपरा आणि खेळाडूंचा झंझावात – स्पर्धा अत्यंत शिस्तप्रिय आणि खेळाडूप्रेमी वातावरणात पार पडल्या, जिथे प्रत्येक विभागातील खेळाडूंनी आपल्या प्रतिस्पर्धकांसमोर कडवे आव्हान उभे केले. मात्र, यजमान बी.जे.एस. महाविद्यालयाच्या खेळाडूंनी विशेष चमक दाखवत महाविद्यालयाचा गौरव वाढवला: या स्पर्धेत हर्ष पहिलवान याने सुवर्णपदक, सलोनी जाधव हिला सुवर्णपदक, मृणाल जाधव रौप्यपदक यांनी कामगिरी केली.
हर्ष आणि सलोनी यांनी सुवर्णपदके जिंकून वाघोलीचे नाव विद्यापीठाच्या स्तरावर पुन्हा एकदा मोठे केले.
सलग २० वर्षांच्या आयोजनाचा गौरवशाली विक्रम – बी.जे.एस. महाविद्यालयासाठी या वर्षीच्या आयोजनाचे विशेष महत्त्व आहे, कारण महाविद्यालयाने सलग २० वे वर्ष या आंतरविभागीय स्पर्धेचे यशस्वी संयोजन करण्याचा विक्रम केला आहे. हा विक्रम महाविद्यालयाची क्रीडा संस्कृती सातत्याने खेळाडूंना प्रोत्साहन देणारी आहे.
क्रीडा संचालक डॉ. रमेश गायकवाड यांच्या नेतृत्वाखाली डॉ. सचिन कांबळे, प्रा. अंगद साखरे, गिरीश शहा, श्याम पाटील यांच्यासह संपूर्ण क्रीडा समिती, शिक्षक व शिक्षकेत्तर कर्मचाऱ्यांनी स्पर्धेचे नियोजन अत्यंत यशस्वीरित्या पार पाडले.
