शिक्रापूर (ता. शिरूर): येथील मलठण फाट्यावर आज (दिनांक ३० ऑगस्ट) सायंकाळी ६ वाजता एक थरारक घटना घडली. सातारा पोलिसांच्या रेकॉर्डवरील कुख्यात घरफोडीचा आरोपी लखन भोसले (वय २५, रा. खटाव, जि. सातारा) याने त्याला पकडण्यासाठी आलेल्या पोलिसांवर गुप्तीने हल्ला केला. पोलिसांनी केलेल्या गोळीबारात तो गंभीर जखमी झाला आणि उपचारादरम्यान त्याचा मृत्यू झाला.
सातारा पोलिसांना हवा असलेला आरोपी लखन भोसले आणि त्याचा साथीदार शिक्रापूर परिसरात असल्याची गुप्त माहिती मिळाली. दोन दिवसांपूर्वीच लखन भोसलेने चाकूचा धाक दाखवून एका महिलेचे दागिने लुटले होते, ज्याचा व्हिडिओ सीसीटीव्हीमध्ये कैद झाला होता.
त्याला पकडण्यासाठी सातारा पोलिसांचे चार सदस्यीय पथक शिक्रापूर येथे पोहोचले. पोलिसांनी लखन भोसले याला ताब्यात घेण्याचा प्रयत्न केला असता, त्याने अचानक पोलिसांवर गुप्तीने हल्ला केला. या हल्ल्यात पोलीस कर्मचारी तुषार भोसले आणि सुजित भोसले जखमी झाले.
आरोपीच्या या हल्ल्यानंतर पोलिसांनी स्वसंरक्षणासाठी गोळीबार केला. यात लखन भोसले गंभीर जखमी झाला. त्याला तात्काळ ग्रामीण जिल्हा रुग्णालयात उपचारासाठी दाखल करण्यात आले, मात्र उपचारादरम्यान त्याचा मृत्यू झाल्याची माहिती मिळाली आहे. या चकमकीदरम्यान त्याचा दुसरा साथीदार घटनास्थळावरून पळून जाण्यात यशस्वी झाला असून, पोलीस त्याचा शोध घेत आहेत.
