पुणे जिह्यातील दौंड तालुक्यातील चौफुला येथील अंबिका कला केंद्रात सोमवारी (दि. २१) रात्री उशिरा, अंदाजे ११ वाजण्याच्या सुमारास गोळीबाराची धक्कादायक घटना घडली आहे. या प्रकरणी चार व्यक्तींविरोधात यवत पोलीस ठाण्यात गुन्हा दाखल करण्यात आला आहे, अशी माहिती दौंडचे उपविभागीय अधिकारी बापूराव दडस यांनी दिली.
अंबिका कला केंद्राचे व्यवस्थापक बाबासाहेब आंधळे यांनी या घटनेबाबत यवत पोलीस ठाण्यात तक्रार दिली आहे. त्यानुसार, चंद्रकांत मारणे, गणपत जगताप, बाबासाहेब मांडेकर आणि एक अनोळखी व्यक्ती यांच्यावर गुन्हे नोंदवण्यात आले आहेत.
बारामतीचे अप्पर पोलीस अधीक्षक गणेश बिराजदार यांनी या घटनेची पुष्टी केली असून, त्यांनी स्पष्ट केले की गोळीबार झाला असला तरी, यामध्ये कोणीही जखमी झाले नाही. सध्या या प्रकरणात चार आरोपी असल्याचे निष्पन्न झाले आहे, त्यापैकी तिघांची नावे समोर आली असून एक जण अद्याप अज्ञात आहे. यवत पोलीस या प्रकरणाचा सखोल तपास करत आहेत.
