वडिलांच्या मृत्यूची वार्ता समजताच दुःख सहन न झाल्याने लाडक्या लेकीने संपविले जीवन

Swarajyatimesnews

एकाच वेळी बापलेकिची निघाली अंत्ययात्रा

नाशिक – दिनांक २५ जानेवारी. वडिलांच्या आकस्मिक निधनाच्या दुःखाने भावनाविवश होऊन २९ वर्षीय तरुणीने स्वतःच्या आयुष्याचा दुर्दैवी अंत केला. नाशिकच्या जेलरोड परिसरातील भीमनगर येथे ही हृदयद्रावक घटना घडली असून बापलेकीच्या मृत्यूने परिसरात दुःख व्यक्त करण्यात येत आहे.

मारुती वाघमारे (वय ६५) यांना प्रकृती बिघडल्यानंतर बिटको रुग्णालयात दाखल करण्यात आले होते. त्याचवेळी त्यांच्या कुटुंबीयांना डॉक्टरांनी त्यांच्या मृत्यूची बातमी दिली. घरात असलेल्या त्यांच्या अविवाहित मुलीला, प्रीती वाघमारे (वय २९), वडिलांच्या निधनाची वार्ता समजताच ती अत्यंत दुःखाने व्याकुळ झाली.

भावनांच्या भरात प्रीतीने घरातील रॉकेल स्वतःच्या अंगावर ओतून स्वतःला पेटवून घेतले. तिच्यासोबत असलेल्या ८ वर्षीय पुतणीने ही हृदयद्रावक घटना पाहून आरडाओरड केली. तिच्या आवाजाने इतर कुटुंबीय घटनास्थळी धावून आले, परंतु तोपर्यंत प्रीती आगीने पूर्णतः वेढली गेली होती.

कुटुंबीयांनी तत्काळ तिला बिटको रुग्णालयात दाखल केले, मात्र डॉक्टरांनी तिला मृत घोषित केले. या दुहेरी दु:खद घटनेनंतर वडील आणि मुलीची अंत्ययात्रा एकाचवेळी काढण्यात आली आणि दसक येथील अमरधाममध्ये त्यांच्यावर अंत्यसंस्कार करण्यात आले.

दरम्यान, वडिलांसह तरुणीचीही अंत्ययात्रा एकाचवेळी काढण्यात येऊन दोघांवर  अमरधाममध्ये अंत्यसंस्कार करण्यात आले. याप्रकरणी उपनगर पोलीस ठाण्यात नोंद करण्यात आली असून पुढील तपास वरिष्ठ पोलीस निरीक्षक जितेंद्र सपकाळे यांच्या मार्गदर्शनाखाली पोलीस उपनिरीक्षक त्र्यंबकगिर गोसावी हे करीत आहेत.

Leave a Reply

Your email address will not be published. Required fields are marked *

error: Content is protected !!