पुण्यातील शिवाजीनगर न्यायालयाच्या आवारात कौटुंबिक वादातून तरुणाने गळफास घेऊन आत्महत्या केल्याची घटना शनिवारी (ता. ८) सायंकाळी घडली. सोहेल येनघुरे (वय २८, रा. पाषाण) असे आत्महत्या केलेल्या तरुणाचे नाव आहे.
मिळालेल्या माहितीनुसार, सोहेल आणि त्याच्या पत्नीचे किरकोळ कारणांवरून वाद झाले होते. शनिवारी घरगुती भांडणानंतर सोहेलने पत्नीला घटस्फोटाची धमकी दिली. त्यानंतर पत्नी आणि दोन मुलांसोबत ते शिवाजीनगर न्यायालयाच्या आवारात गेले.
न्यायालय बंद असल्यामुळे परिसर सुनसान होता. चिंचेच्या झाडाखाली जेवण केल्यानंतर पती-पत्नीचा पुन्हा वाद झाला. रागाच्या भरात सोहेलने पत्नीची ओढणी घेऊन झाडाला गळफास घेतला. पत्नी आणि मुलांच्या डोळ्यांसमोरच हा प्रकार घडल्याने परिसरात खळबळ उडाली.
शिवाजीनगर पोलिस ठाण्याचे वरिष्ठ निरीक्षक चंद्रशेखर सावंत यांच्या मार्गदर्शनाखाली पुढील तपास करण्यात येत आहे.
