सणसवाडी (ता. शिरूर): गावाच्या सेवेत अहोरात्र राबणाऱ्या कर्मचाऱ्यांप्रती कृतज्ञता व्यक्त करत, माजी जिल्हा परिषद सदस्या कुसुम आबाराजे मांढरे यांनी सणसवाडी ग्रामपंचायत कर्मचाऱ्यांची दिवाळी यंदा गोड केली. त्यांनी कर्मचाऱ्यांना दिवाळी फराळ आणि भेटवस्तू देऊन त्यांच्या निष्ठावान कार्याचा सन्मान केला.
गाव जागण्यापूर्वी आणि झोपल्यानंतरही सेवा देणारे ‘कर्मचारीच खरे बळ’ – ग्रामस्थांच्या सेवेत असणारे कर्मचारी हे गावचे निष्ठावान सेवक असून, ते आई-वडिलांसारखी जनतेची काळजी घेतात. “गावाला जाग येण्यापूर्वी आणि गाव झोपी गेले तरी त्यांच्या सेवेसाठी रात्रंदिवस प्रामाणिकपणे राबणाऱ्या या कर्तव्यनिष्ठ हातांविषयी कृतज्ञता व्यक्त करणे, हे सर्वांचे कर्तव्य आहे,”असे मत कुसुम आबाराजे मांढरे यांनी यावेळी व्यक्त केले.
यावेळी सरपंच रूपाली दरेकर, उपसरपंच राजेंद्र दरेकर, माजी उपसरपंच ॲड. विजयराज दरेकर यांच्यासह ग्रामपंचायत कर्मचारी मोठ्या संख्येने उपस्थित होते.
नेतृत्वाकडून कृतज्ञता आणि कौतुक – कुसुम आबाराजे मांढरे यांच्या या सामाजिक जाणिवेचे आणि औदार्याचे कौतुक करताना स्थानिक नेत्यांनी त्यांच्या कार्याची प्रशंसा केली:
“सणसवाडीसारख्या मोठ्या ग्रामपंचायतीच्या माध्यमातून नागरिकांना विविध सेवा पुरवण्याचे प्रामाणिक काम हे कर्मचारी करतात. सामाजिक बांधिलकीचे भान ठेवून मांढरे यांनी त्यांची दिवाळी गोड केली. जिल्हा परिषदेच्या माध्यमातून त्यांनी केलेले काम अत्यंत प्रेरणादायी आहे.”– सरपंच रूपाली दरेकर
“कुसुम आबाराजे मांढरे यांचा सणसवाडी गावाविषयी असणारा जिव्हाळा आणि आपुलकी महत्त्वाचे आहे. त्यांचे काम नेहमीच समाजाला दिशा देणारे आणि सामाजिक बांधिलकी जपणारे असते. त्या प्रत्येक कामात सर्वसामान्य माणूस आणि गोरगरीब जनता डोळ्यासमोर ठेवून काम करतात.”- उपसरपंच राजेंद्र दरेकर
“मांढरे यांनी सणसवाडी गावाविषयी व कर्मचाऱ्यांविषयी नेहमीच आपुलकी बाळगत विकासाचे राजकारण केले आहे. त्यांच्या सामाजिक कामामुळे त्यांची आगळी वेगळी ओळख निर्माण झाली आहे. गोरगरिबांच्या मदतीला धावून जाणाऱ्या त्या कुटुंबातील एक सदस्य वाटतात.” – ॲड. विजयराज दरेकर
या उपक्रमामुळे ग्रामपंचायत कर्मचाऱ्यांच्या श्रमांना योग्य सन्मान मिळाला, तर कुसुम आबाराजे मांढरे यांनी पुन्हा एकदा सामाजिक संवेदना आणि कृतज्ञतेचा नवा आदर्श घालून दिला.
