मिशन लक्ष्यवेध हाय परफॉर्मन्स सेंटरचा शुभारंभ
दि. २८ ऑगस्ट पुणे– राष्ट्रीय क्रीडा दिनाचे औचित्य साधून, पुणे येथे ३३१ पदकविजेत्या खेळाडूंचा गौरव करण्यात येणार आहे. महाराष्ट्र शासनाच्या शालेय शिक्षण व क्रीडा विभागामार्फत शुक्रवार, २९ ऑगस्ट रोजी म्हाळुंगे-बालेवाडी येथील शिवछत्रपती क्रीडा संकुलात हा सोहळा पार पडेल. या कार्यक्रमात, ‘मिशन लक्ष्यवेध हाय परफॉर्मन्स सेंटर’ या महत्त्वाकांक्षी योजनेचाही शुभारंभ होणार आहे.
दुपारी ४ वाजता सुरू होणाऱ्या या समारंभासाठी उपमुख्यमंत्री तथा पुणे जिल्ह्याचे पालकमंत्री अजित पवार यांच्यासह केंद्रीय राज्यमंत्री मुरलीधर मोहोळ, उच्च व तंत्र शिक्षण मंत्री चंद्रकांत पाटील, कृषीमंत्री दत्तात्रय भरणे, क्रीडामंत्री माणिकराव कोकाटे, विधानसभेचे उपाध्यक्ष अण्णा बनसोडे, विधान परिषदेच्या उपसभापती नीलम गोऱ्हे आणि राज्यमंत्री माधुरी मिसाळ उपस्थित राहतील. यांच्यासोबतच अनेक लोकप्रतिनिधी, विभागीय अधिकारी व क्रीडा क्षेत्रातील मान्यवरही या कार्यक्रमाला हजेरी लावणार आहेत.
उत्तराखंडमध्ये झालेल्या राष्ट्रीय क्रीडा स्पर्धेत महाराष्ट्राने एकूण २०१ पदके मिळवून प्रथम क्रमांक पटकावला होता. यामध्ये ५५ सुवर्ण, ७० रौप्य आणि ७६ कांस्य पदकांचा समावेश आहे. या स्पर्धेतील ३१४ खेळाडूंसह आंतरराष्ट्रीय स्तरावर यश मिळवलेल्या ६ खेळाडूंचाही यावेळी सत्कार करण्यात येईल.
सुवर्णपदक विजेत्यांना ७ लाख, रौप्यपदक विजेत्यांना ५ लाख आणि कांस्यपदक विजेत्यांना ३ लाख रुपयांचे रोख बक्षीस दिले जाईल. तसेच, त्यांच्या प्रशिक्षकांना अनुक्रमे ५० हजार, ३० हजार आणि २० हजार रुपयांचे पारितोषिक दिले जाईल. या सोहळ्यात एकूण २८.७० कोटी रुपयांची बक्षिसे वाटली जातील.
या सन्माननीय खेळाडूंमध्ये ऑलिंपिक पदकविजेता स्वप्नील कुसाळे, आशियाई पदक विजेती राही सरनोबत, ऑलिंपिकपटू देवेंद्र वाल्मिकी आणि विश्वकरंडक विजेती प्रियंका इंगळे यांचा समावेश आहे. सर्वाधिक ८ पदके जिंकणाऱ्या अदिती हेगडे हिला तब्बल ३२ लाख रुपयांचे बक्षीस मिळणार आहे.
मिशन लक्ष्यवेध हाय परफॉर्मन्स सेंटर – या कार्यक्रमात ‘मिशन लक्ष्यवेध’ योजनेच्या बोधचिन्हाचे अनावरणही होणार आहे. या योजनेअंतर्गत, राज्य सरकार दरवर्षी १६० कोटी रुपये खर्च करून १२ क्रीडा प्रकारांतील खेळाडूंना आंतरराष्ट्रीय दर्जाचे प्रशिक्षण देणार आहे. पहिल्या टप्प्यात ॲथलेटिक्स, हॉकी, कुस्ती, वेटलिफ्टिंग, रोइंग आणि लॉन टेनिस या ६ खेळांचा समावेश आहे. याबद्दलची माहिती सहसंचालक सुधीर मोरे यांनी दिली.
या गौरव सोहळ्याला राज्यातील ३०० खेळाडू, १०० मार्गदर्शक, १०० पदाधिकारी आणि क्रीडा प्रबोधिनीमधील प्रशिक्षणार्थी असे एकूण ८०० जण उपस्थित असतील.
