मजुरीने थकलेल्या वडिलांचा चेहरा पाहिल्यावर स्पर्धा परीक्षेतील अपयश पचवून मिळवले यश
स्‍त्‍यावर डांबर टाकून मजुरी करणाऱ्या वडिलांनी आपल्‍या लेकीला भरपूर शिकविण्याचे धेय्य बाळगले. एकवेळ पोटाची खळगी भरली नाही तरी चालेल, पण मुलीला शिक्षणात काही कमतरता पडायला नको, अशी खूणगाठ त्‍यांनी बांधलेली.अखेर वडिलांनी पाहिलेले स्‍वप्‍न पूर्ण झाले अन् ज्‍योती यशवंत वाघेरे हिने महाराष्ट्र लोकसेवा आयोगाच्‍या महसुल सहाय्यक पदाच्‍या परीक्षेत यश मिळवित आई वडिलांच्या कष्टांचे पांग फेडले.
या यशस्‍वी प्रवासाबद्दल ज्‍योती म्‍हणाली, की आई-वडील तसेच भाऊ-बहिणीने मला स्पर्धा परीक्षांची तयारी करत असताना कधीही आर्थिक चणचण भासू दिली नाही. वटवृक्षाप्रमाणे जीवन प्रवासात माझ्यासोबत उभे राहिले. त्‍यांच्‍या आपुलकीची सावली मला लढण्याची प्रेरणा देणारी होती.
आयुष्यात अनेक वेळा अपयश पचविले. वडिलांचा थकलेला चेहरा बघितल्‍यावर पुन्‍हा दुसऱ्या दिवशी जिद्दीने अभ्यास करण्याची प्रेरणा द्यायचा. पेठ रोड येथील उन्नती विद्यालयातून शालेय शिक्षण घेतल्‍यानंतर उच्च शिक्षण पंचवटी महाविद्यालयातून घेतले. यानंतर स्पर्धा परीक्षांच्‍या तयारीला सुरवात केली. अखेर तिच्‍या प्रयत्‍नांना यश आले असून, प्रशासकीय सेवेत ती दाखल झाली आहे.
स्पर्धा परीक्षांची तयारी करणाऱ्या युवकांना संदेश देताना ज्‍योती म्‍हणाली, की स्पर्धा परीक्षा तयारीचा प्रवास खडतरअसला तरी मोठे यश देणारा आहे. स्‍वप्‍न बघणे ही केवळ सुरवात आहे. स्‍वप्‍न साकार करण्यासाठी दृढ निश्‍चय, आणि कठोर परीश्रम आवश्‍यक आहेत.
