मंचर – -माजी खासदार स्वर्गीय किसनराव बाणखेले यांचे धाकटे चिरंजीव विकास किसनराव बानखेले (वय ५२) यांनी गुरुवार, दि. २३ रोजी मंचर येथील राहत्या घरी गळफास घेऊन आत्महत्या केल्याची घटना घडली असून आत्महत्येमागील कारण अस्पष्ट आहे.विकास बाणखेले यांच्या आत्महत्येमुळे मंचरसह पुणे जिल्ह्यातील ग्रामीण भागात दुःख व्यक्त करणार येत आहे
विकास किसनराव बाणखेले हे नेहमीप्रमाणे गुरुवारी सकाळी गावात आले होते, छत्रपती शिवाजी महाराज चौकात मित्रांबरोबर गप्पा मारून ते घरी गेले. ते जेवणासाठी साडेअकरा वाजता आले नसल्याने त्यांचे ज्येष्ठ बंधू आणि लाला अर्बन बँकेचे संचालक रामदास बाणखेले यांनी दरवाजा वाजवून आवाज दिला. परंतु आवाजाला कोणताही प्रतिसाद न मिळाल्याने त्यांनी खिडकीतून पाहिले असता विकास यांनी एका वायरच्या साह्याने गळफास घेऊन आत्महत्या केल्याचे दिसून आले.
विकास बाणखेले यांची पत्नी वर्षा शिक्षिका असून मुलगा साईराज आहे तर विकास बाणखेले मंचर येथील लाला अर्बन बँकेत लेखनिक म्हणून काम करत होते.
घटनास्थळी मंचर पोलिसांनी जाऊन पंचनामा केला आहे. त्यानुसार मंचर पोलिसांनी रामदास बाणखेले यांच्या फिर्यादीनुसार विकास बाणखेले यांनी आत्महत्या केल्याचा गुन्हा पोलीस हवालदार तानाजी हगवणे यांनी दाखल केला. पुढील तपास पोलीस हवालदार सुमित मोरे करत आहे. विकास बाणखेले यांचा मृतदेह मंचर उपजिल्हा रुग्णालयात शव विच्छेदनासाठी नेण्यात आला असून शुक्रवार दि. २४ रोजी सकाळी नऊ वाजता मंचर येथील वैकुंठ भूमीमध्ये अंत्यसंस्कार करण्यात येणार असल्याचे सांगण्यात आले.
