वाघोली (ता.हवेली) भारतीय जैन संघटनेच्या कला, वाणिज्य व विज्ञान महाविद्यालयाने ग्रामीण भागातील विद्यार्थ्यांसाठी स्पर्धा परीक्षांची तयारी सोपी करण्यासाठी एक महत्त्वपूर्ण पाऊल उचलले आहे. महाविद्यालयाच्या कॅम्पसमध्ये आता ‘स्पर्धा परीक्षा केंद्र’ सुरू झाले आहे, ज्यामुळे विद्यार्थ्यांना थेट गावातच उच्च दर्जाचे मार्गदर्शन उपलब्ध होणार आहे.
देवा जाधवर: नव्या युगातील स्पर्धा परीक्षांचा मंत्र- उद्घाटन सोहळ्याला प्रमुख पाहुणे म्हणून स्पर्धा परीक्षा मार्गदर्शक युनिक अकॅडमीचे देवा जाधवर उपस्थित होते. त्यांनी आपल्या प्रभावी आणि विचारपूर्वक भाषणाने विद्यार्थ्यांमध्ये एक नवी ऊर्जा भरली. जाधवर म्हणाले, “आता स्पर्धा परीक्षा म्हणजे केवळ पुस्तकातील माहिती घोकून काढणे नाही. जगातील चालू घडामोडी, राष्ट्रीय आणि आंतरराष्ट्रीय विषयांचे सखोल ज्ञान आणि प्रश्नपत्रिकांचे बदलणारे स्वरूप समजून घेणे महत्त्वाचे आहे.” त्यांनी विद्यार्थ्यांच्या मानसिकतेवर आणि तयारीच्या योग्य पद्धतीवर विशेष भर दिला. त्यांच्या मार्गदर्शनाने विद्यार्थ्यांना तयारीसाठी एक स्पष्ट दिशा मिळाली.
यशाची खरी प्रेरणा: PSI सौरभ हरेल – या कार्यक्रमाला महाविद्यालयाचे माजी विद्यार्थी आणि आताचे पोलिस उपनिरीक्षक (PSI) सौरभ हरेल यांची उपस्थिती विद्यार्थ्यांसाठी एक प्रेरणादायी अनुभव ठरली. हरेल यांनी आपला यशस्वी प्रवास विद्यार्थ्यांसमोर मांडला. ते म्हणाले, “पदवीचे शिक्षण घेत असतानाच मी स्पर्धा परीक्षेची तयारी सुरू केली. त्यासाठी नियमितता, शिस्त आणि सकारात्मक दृष्टिकोन खूप महत्त्वाचा आहे.” त्यांचा अनुभव ऐकून अनेक विद्यार्थ्यांच्या मनात यशाची ज्योत पेटली.
कार्यक्रमाच्या अध्यक्षस्थानी महाविद्यालयाचे प्राचार्य डॉ. संजय गायकवाड होते. महाविद्यालयाचे सी इ ओ डॉ. रवींद्रसिंह परदेशी यांनी या उपक्रमाचे कौतुक केले. या केंद्राच्या माध्यमातून विद्यार्थ्यांना फक्त पुस्तकी ज्ञानच नाही, तर योग्य मार्गदर्शन आणि प्रेरणाही मिळणार असल्याचे मत व्यक्त केले.या कार्यक्रमाचे संयोजन डॉ सचिन कांबळे, प्रा. अंगद साखरे, प्रा.प्रदीप आव्हाड, प्रा.निखिल आगळे, डॉ.शिवाजी सोनवणे यांनी केले.
